البارت 40:
-----
ملي رجعنا من السبيطار..وزينب فبيتها وانا فبيتي..انير جا وسولني شنو قال الطبيب وعاودت ليه كولشي بالتفصيل..تقلق وتعصب..ولكن فالاخير رضا بقضاء الله..
انا مشيت للمعهد..كانت عندي حصة مانقدرش نغيبها..ولكن مع ذلك كنت مزال كنفكر فزينب..صافي وقررت نمشي من الدار من بعدما تاصلت بلاله فضيلة..فرحات وقالت ليا مرحبا بيا نسكن عندها..
رجعت للدار..دقيت وهو يحل بيا أنير الباب..
-سلام كيف بقات زينب..؟
-لاباس..تانيلا..ممكن تسخري..جيبي الخبز..
-بلاتي غير نحط صاكي ونخرج..
-واخا غير طلقي راسك دغيا..
يالله بغيت نمشي وهو يطل علينا خليل..غير شفتو..بدا قلبي كيضرب..بحالا خنقتيني..حاولت مانشوفش فيه..دبا عرفت علاش انير مصيفطني نتسخر باش مانتلاقاش انا وخليل..
دخلت للبيت وسديتو عليا..حتى سمعتو خرج..مسحت دموعي وانا نخرج نطل على زينب..كيف بقات..
-سلام زينب..كيف بقيتي لاباس ..
ماجاوباتنيش..
-مهم انا راني قررت نمشي نسكن عند جارتي لاله فضيلة.
جاوبني انير:-كيفاش؟عاودي اش قلتي؟
-انا مابغيتش نثقل عليكم..وزايدون راها انسانة مزيانة ورحبات بيا..نبغيكم غير ماتقولوش لواليديا بلي انا ماساكناش هنا..
-لا لا ماغاديش نخليك تمشي انت امانة فرقبتي..
-عافاك بلا ما ضغط عليا..انا هذا قراري..وراه زينب دبا مريضة خصها العناية ديالك بلا مانزيدك همي..
-لا انا هضرة وحدة لي عندي قلتها..زينب هضري معاها ماتخليهاش تمشي!
جاوبات زينب..
-أنير عندو الصح..ماعندك فين تمشي..وزايدون نسيتي بلي خليل خويا ساكن تما..
حبساتني بهاد الهضرة ديالها..كيفاش نقدر نشزف وجهو كل نهار ونصبر..مايمكنش..مانقدرش..
-انا خارج نجيب العشاء..زينب قنعيها تحيد هاد الفكرة من راسها..بينما جيث..
بقيت ساكتة حتى مشا..
-تانيلا..سمعيني نقوليك..انا ماشي كنكرهك كيف كيحساب ليك..انا غير بغيت نحمي خويا..
-انا مابقاش كيهمني تبغيني ولا تكرهيني..اصلا دبا عاد كنحاول نوقف على رجلي..
-تانيلا..عندي شي هضرة بغيت نقولها لك..نبغيك تسمحي ليا..
-انا كنسمع..
-اليوم...فاش كان خويا خليل هنا..خبرني بلي كيبغي واحد التلميذة ديالو..وغادي يتزوج بيها...صدمني بزاف.. و وانا كنت باغيه اتزوج صاحبتي جويرية..ولكن..
-خاب الظن ديالك فيه ياك؟
-سمعيني حتى اللخر وديك الساعة حكمي عليا..انا غلطت فحقك بزاف...ماعرفت واش الله بدا كيعاقبني فولادي..وهانتي كتشوفي حالتي لي وصلت ليها..مانقدرش نهز ذنوب شي حد..نخاف على ولدي ولابنتي يخرج فيهم هادشي..لذلك انا غنصارحك بكولشي...صاحبتي جويرية..كانت كتبغي خليل بزاف وحتى انا كنت كنتمنى انهم يتزوجو..باش هكا انا وياها نبقاو ديما صحابات وعلاش لا عائلة وحدة....وملي تفارق معاها خليل..حزنات بزاف..وفاش عرفناه غيتزوج بيك..حاولنا نفرقو بيناتكم..ولكن ملي وافق بابا حسينا بلي غنخسرو...واقتارحات عليا جويرية..انها تمشي عند واحد المرا..و و دير ليك سحر باش تكرهي خليل..
-حسبي الله ونعم الوكيل..فيكم..علاش درتو ليا هادشي..
-تانيلا انا مادرت ليك والو..هي لي دارت كولشي..انا نكمل ليك وحكمي..ملي بديتي كتمرضي نهار عرسك عرفنا بلي الخطة نجحات...ولكن في هاد الاواخر..بابا وبابات جويرية فسخو العقد لي كان بيناتهم..ولي تضرر كثر هو باباها..واحد النهار جات عندي جويرية وقالت ليا بلي تعرفات على واحد الراجل..وقريب اتزوجو..تزايدنا انا وياها فالهضرة وجبدنا شحال من حاجة..قلت ليها انا بغيتك لخويا..ولكن طلعتي شماتة..هي مارضاتش..وقالت ليا خوك غير بخري بيه..وبدات تعايرو حيث ماكيديهاش فيا..انا مارضيتش وعايرتها.وقلت ليها بلي تانيلا حسن منك وغير ظلمتها.هي فاش قالت ليا..بلي دارت ليه الثقاف باش عمرو ما يقدر اقرب لك وابقى ديما كيكرهك..
-حشومة عليك...كون فير ماقلتي ليا هاد الهضرة..زدتي حطمتيني..اشنو درت ليكم انا حتى تأذيوني..
-عافاك سمحي ليا..باش ربي يسمح ليا..انا ماقصدتش نوصلو لهادشي ولكن الشيطان عمانا..وكنواعدك نرجعك مع خليل..اكيد حتى هو غيكون كيبغيك..
-خليني عليك...الله ياخد فيكم الحق بجوج..
خليتها..كتعيط وانا نسد عليا فالبيت..بقيت كنفكر فكلامها..وكندعي عليهم فخاطري..حتى بردت...
وبديت كنطلب ربي مايسمعش دعائي..حيث كيفما كان الحال هي مرت ولد عمي..
ملي جاب انير العشاء بقا كيعيطلي درت راسي ناعسة..مابغيتش نخرج عندهم.

فالصباح..مشيت للمعهد..دوزت حصة زوينة خصوصا ملي تعاونا انا وواحد البنت صاوبنا تصميم ديال واحد الدار والاستاذ عجبو العمل..
رجغت للدار ورجعت كنفكر فنفس الموضوع لقيت زينب موجدة الغذاء..انير مشا لايت بها لخدمتو..بقينا انا وياها الراس فالراس..
كناكلو وكنشوفو فبعضياتنا..
-شوفي انا مابقاش كيهمني شنو درتي انت وصاحبتك..الى كانت هي لي ظالمة..ربي غيخلصها..
-امين..بغيتك غير تسمحيلي..
-مسامحاك..واخا لي داز عليا ماشي قليل..
-شوفي..من اليوم غنحاول نهضر مع خويا.ونطلبو يرجع يدوي معاك..
-بلاتي...انا ماقلتش ليك بغيت نرجع معاه..خوك آذاني بلا قياس ماعرفت واش بخاطرو ولا لا..انما هو لي ماعمرني غنقدر نسامحو..
-رجوع الله..ماشي انتي اول وحدة تطلق ويرجعها راجلها...
-خوك الاله فحياتو امراة اخرى..

إرسال تعليق

يتم التشغيل بواسطة Blogger.