البارت 35:

-سمح ليا استاذ ما قصدتش نضيع ليك وقتك..
-لا انما كان عليه اعلمنا بكري..ضيع ليا وقتي هكاك..
-صافي انا غنمشي..دبا بلا ما نزيد نعطلك..
ناضت وخرجات من الكافي..
عيطت ليها تسنى حتى نخلص ولكن بانت ليا تقلقات..مشيت بالزربة خلصت وخرجت كنقلب عليها..مابانتش ليا..هزيت طموبيلتي وبقيت غادي من الطريق لي جيت منها..عرفتها غتمشي على رجليها حيث محفظتها..مزال فطموبيلتي..
بانت ليا غادية بوحدها..وانا نعيط ليها ماسمعاتنيش..وقفت الطموبيل ديالي وانا نجري باش نلحق عليها..
-سارة تسناي..مالك تقلقتي؟
-غير خليني نمشي بوحدي..
-انا لي جبتك معايا انا لي غنرجعك..يالله زيدي بلا عناد..
-لا عارفة الطريق بلا مانضيعلك وقتك..
-يالله زيدي خودي محفظتك وطابليتك وسيري...
شافت فيا وهي ترجع..طلعت للطموبيل وانا نحل ليها الباب..
-سارة طلعي..
بانت ليا استسلمات للامر..وطلعات..قبل ما نوصلو للحي ديالهم وقفت الطموبيل..
-سارة عطيني نمرة داك السيد..مرة اخرى نهضر معاه انا.
-واخا سجلها عندك..
----------
كنت جالسة كنحط الخواطر ديالي فالمنتدى..
اليوم لقيت شي تعاليق..فرحاتني...
ولكن الاغلبية..ماقدروش احكمو على فقرة واحدة لذلك حطيت لهم شي خواطر..
سمعت الدقان فالباب..ومشيت حليت لقيتها لاله فضيلة فرحت بزاف..ملي جات تشوفني..
-بنتي...كنتي مشغولة؟
-لا كنت غير كنكتب شي حاجة..ماشي مهمة..انا نوض نجيب ليك الكاسكروت..يالله لقيتيني صاوبتو..
فاش رجعت لقيتعا كتقرا داكشي لي كنكتب...
-ههههه شفتيهم!
-هادشي زوين بزاف..واش كتقدري تكتبي بحال هكا..
-كنخربق مرة مرة...وصافي..
-جلسي نهضر معاك..علاش ما كملتيش قرايتك..قلتي ليا عندك الباك!
-ماكرهتش والله..
-عندي واحد الفكرة..انا عندي اصدقاء قدام..في العمل..اقدر الى تاصلت بشي حد..يعاوننا..
-ولكن انا راه عامين باش شديت الباك..فات عليا الحال..
-ماتقوليش هادشي..مانقدرش نشوفك كضيعي..واش باغا تقراي؟ انا غنعاونك..باغت تكتبي انا ندير جهدي ونلقى شي واحد لي يعاونا..
-بصاح..والله مامصدقة هادشي..زعما نقدر نعاود نقرا..و نتعلم!؟
-الى عندك رغبة.اه تقدري حتى حاجة ما مستحيلة....
حسيت بواحد الفرحة كبيرة..قلبي كينبض بالجهد..عينيا بغاو ادمعو..لاله فضيلة حتى هي كتشوف فيا وكضحك..تنفست من أعماقي وانا كنقوليها بلي موافقة....
اجمل خبر سمعتو اليوم...
ملي مشات لاله فضيلة وانا متحمسة ماكرهتش نمشي دبا نقرا..دخل خليل حتى هو فرحان...مابقاش كيهمني نتخاصم انا وياه ولا علاقتو بجويرية..
-سلام رجعتي؟على سلامتك!
-الله يسلمك..اش كاين؟
-والو..نوجد ليك للعشاء؟
-واخا..
جلسنا كنتعشاو..وانا بقيت كنشوف فيه..
-مالكي..فيا شي حاجة فوجهي؟
-لا..خليل..بغيت نرجع نقرا!!
-كيفاش..وفين غتقراي وامتى وشنو غديري؟
-ماعرفت انا مزال ما فكرت فهادشي..مهم باغا نكمل قرايتي ولا نعاود ما عنديش مشكل..
-ماعجباتنيش ها الفكرة.والدار شكون غيديها فيها...وانا..ماتنساي راك جيتي لهنا بصفتك مراتي..!

مشيت جلست حداه حتى ولو اقتضى الامر نحزرو غنحزرو..شحال وانا كنطلب بابا ونحزر فيه ولكن ماخلانيش..
-خليل عافاك...انا غنوفق بيناتهم..
-لا ماكتبانش ليا هذي فكرة مزيانة..غتلهاي بالقراية وتنساي راسك..
-عافاك عافاك..الله يرحم ليك واليديك...من حقي نقرا بحال كاع البنات..ماتحرمنيش من هادشي..
-انا شبعت..غنوض نعس..
اففف اش غندير دبا..تبعتو لبيت النعاس..وكنحزر فيه..حتى نعس..
-خليل..شفتي دبا كنطلب فيك من الصباح..وا جربني الى قصرت فحق داري..ديك الساعة نجلس..
-اصلا عارفك راسك قاصح..وغتمشي بلا الموافقة ديالي..
-لا..انا مانقدرش ندير شي حاجة بلا ما نتشاور معاك..عافاك خليل..
-واخا..صافي انا غنفكر فالموضوع..
-يعني غتقبل؟
-اكون خير!!يالله خليني نعس..غذا خدام بكري..
هزيت واحد المانطة وغطيتو..وقاديت ليه المخدة..
-يالله تصبح على خير..
-طيرتي ليا النعاس..جيبي ليا الحاسوب ديالي..ووريني شنو حطيتي اليوم..
-واخا نجمع المواعن ونجيبو لك..
---------
-صافي ساليتي..يالله اري نشوف!
جلسات حدايا وشعلات الحاسوب..ودخلات للمنتدى..
-ماكتبتش بزاف..مهم قرا وعطيني رأيك..
بديت كنقرا.. وانا نقوليها تعطيني دفترها..مابغاتش..عرفتها غتكون كاتبة عليا شي حاجة..خليتو حتى يطيح بين ايدي مرة اخرى.
-انا صراحة ماعنديش مع الادب ..خلي هادشي لماليه هما غيعطيو رأيهم حسن مني...
-حتى انت كيهمني رأيك.راك أستاذ ولا لا!
-انا استاذ ديال الرياضة وصافي..انا غنتاصل دبا بواحد السيد..خدام في دار النشر..الى قدرت نتلاقى معاه غيكون حسن..
-كيفاش زعما اقدر تنشر ليا شي حاجة..؟
-كولشي ممكن!هههه بلاتي نصوني عليه..
صونا مرة جوج..يالله بغيت نقطع وهو يجاوب..قلت ليه انا استاذ ديال سارة..وتافقت معاه غذا نتلاقاو مع 10..
-امدرا اش قاليك؟
-كيف سمعتي نتلاقا معاه وديك الساعة يحن الله.!
-ياربي يوافق ياربي..ناري ما مصدقاش..جوج حوايج جاو دقة وحدة..اقدر نرجع نقرا!واقدر ننشر داكشي لي كنكتب فيه 4سنين هادي..
-الانسان الى عندو إرادة اقدر ايدير بزاف ديال الامور فحياتو..عمرك ما تفقدي الامل وتستسلمي..انا مثلا كون بقيت مستسلم كون راني خدام دبا فالعيون وشاد المحل ديال الواليد.ولكن الحلم ديالي..كان هو نصبح استاذ..وكافحت بوحدي..حتى وصلت..
-سعداتك..قدرتي دير هادشي كلو بوحدك..انا مانقدرش ..خاص ديما شي حد اكون بجنبي..

إرسال تعليق

يتم التشغيل بواسطة Blogger.