البارت 31:
بقيت مع ماما..كانت كتسولني واش مرتاحة..واش كيعاملني مزيان..وانا كنجاوب اجوبة لي تريحها..
عنقاتني..وقالت لي..نرتاح بينما وجد الغذاء..حيث العشية انمشيو للعرس....
ماسولتش لا على راجلي ولا على زينب..دخلت للبيت ديال ماما وانا نعس..حتى فيقوني نتغذا..
تغذينا..وكل واحد فين مشا يبدل..
هزيت قفطان أبيض..خيطو فعرسي..و أدال(اللحاف)وصاية بيضاء مطرزة بالخضر..وقطيب حمر..وحطيت النقرة على راسي..حيث من العادات ديالنا..العروسة لي يالله تزوجات..ملي كتحضر مناسبات كيخصها تلبس بحال هكا..
دخلات حتى ماما بدلات حوايجها..
خرجت نشوف زينب واش لبسات..لقيتها فبيت أنير كتلبس القفطان..
خرج عندي انير..
-تانيلا..بلاتي..شوفي الة قدرتي تقولي للواليدة ديالي .تجيب النقرة ديالها لزينب..تلبسها..انا مابغاتش تعطيهم لي..
-واخا..
مشيت كنجر قفطاني..لعند عمتي..بقيت كنطلبها..ولكن مابغاتش..تعطيهم ليها..قالت ليك ماكتعرفش لداكشي وغادي تهرسهم ليها..
رجعت عند أنير..قلت ليه الخبر الغير السار..بان ليا تقلق..وحتى زينب ماعجبهاش الحال..
اوا اش عندو مايدير..عمتي عزيزة عليها حاجتها..هههه..
كنت دايزة من حدا بيتي..بان ليا مفتوح..عرفت مايكون غير خليل..داكشي علاش مادخلتش..وماتسوقتش ليه..
صافي كولشي واجد..هزينا الكادوات لي جابو الرجال..وخرجنا مجموعين..انا تمشيت مع ماما..بان ليا خليل مفقوص حيث ماديتهاش فيه..حتى ماما لاحظات اننا ماهضرناش ملي دخلنا..وانا قلت ليها بلي غير حيث توحشتكم..هملتو شوية..
وصلنا لدار العريس..
كانت عامرة..ورحبو بينا..ومشيت كنسلم على العيالات..وبداو كيسولو فيا واش ولفت..وكيقولو لي بلي خليت بلاصتي..ومالقاو لي يقريهم..صراحة بقا فيا الحال خليتهم وسط الطريق..ولكن هذي سنة الحال..
بانو ليا صحاباتي.جايين..وعيشة هازة بنتها..سلمت عليهم وجلسنا مجموعين..كيسولوني كيف دايرة؟ولفت ولا لا؟الزواج واش زوين ولا خايب؟
قهروني بالأسئلة..ولا تقهرت من التفكير فالاجوبة لي غنعطيهم..مالقيت مانقول الا اني نكذب عليهم..
جات ماما مع زينب..حيث غيمشيو اشوفو فاش اعاونو مامات زيدان..
زينب قليل فاش كتهضر معايا انا بالخصوص..اما صحاباتي تطلقات معاهم..
داز العرس واعر بزاف..حسن من ديالي..بقينا ناشطين وسهرانين فيه حتال 2ديال الليل..عاد.كل واحد رجع فحالو..ملي ودعنا العرسان لي غيمشيو للشمال ادوزو شهر العسل..
سعداتهم! ماشي فحالي مدوزاه فالسبيطار..
رجعنا للدار مبوقين..
عطاتني ماما شي مانطات..نديهم لزينب..وشي مانطات ليا انا وخليل..كنت باغا نبات حدا ماما هاد الليلة باش نهضرو..خصوصا ملي قالت ليا زينب غنرجعو غذا..
ولكن ملي لقينا بابا ناعس..قالت ليا باتي فبيتك..وغذا ارا ما نهضرو..
هزيت بيجامتي للطواليط..حتى بدلت..ورجعت ننعس..
فرشت فالارض جوج بلايص مفرقين..
-فين كنتي غابرة النهار كلو..ولا جيتي لداركم وانت تميكي؟
-سبحان الله..ياك جايبني غير بزز..اوا سكت ونعس..
-لا انا جايبك بخاطري..اصحابليك انا مكلخ...ضحكي عليا بذيك الكذبة ديال زينب باغا تجي..
-اوا دارنا هادي ومن حقي نجي ليها..
تخشيت بلاصتي وانا ننعس...
-اصلا انتوما النساء كلكم بحال بحال..كذابات..ضلعة عوجة..
-اذا حتى اخت...
-ماتفوتيش الحدود ديالك معايا...تانيلا..لحد الان مزال صابر عليك..
نضت من بلاصتي بحالا باغا نضارب..
-شنو ادير غضربني...؟بحال المرة لي فاتت..اصحابلك..الى كندير الماكياج لوجهي باش نخبي هاد الضربة..راه سمحت لك..
وانا نشير بصبعي لوجهي..لي مزال فيه اثار التصرفيقة لي كان عطاني!!
-اصلا انتوما الرجال كلكم بحال بحال..ظالمين!
قلتها وانا نعس..لهلا يقلبو..انا مالي صابرة عليه...صافي والله مانعاود نديها فيه..بقيت ساكتة ليه هاد الوقت حسبها هو خوف منو..وانا اصلا ماعطيتش قيمة لراسي نهار اللول ملي وافقت..
ولكن من اليوم..مزوجة مزوجة..غنستاغل هاد اللقب وناخذ حقوقي ونقضي مصالحي..
ماكاين لي غيمنعي..لا خليل ولا زينب..ولا غيرهم!!ماغنديرش كيف نساء زمان..نبكي على حظي.الى ماكان الرجال نموت...لا انا غنعيش وعندي بزاف ديال الحوايج لي نعيش على قبلهم!
((ﺍﻧﺎ ﺍﻣﺮﺍﺓ ﻧﻀﺠﺖ ﻣﻨﺬ ﻧﻌﻮﻣﺔ ﺍﺿﺎﻓﺮﻫﺎ ﻛﻴﻒ ﺗﺮﻳﺪ ﺍﻥ ﺗﻌﻴﺪ ﺑﻴﺎ ﺍﻻﻳﺎﻡ ﻟﻠﺤﺐ ﻭ ﺍﻟﻐﺮﺍﻡ))م.ن
-------------
بعد الهضرة لي قالت ليا تانيلا..حسيت براسي..ماكنسواش ملي مديت عليها ايدي..وكاعما اعتاذرت..كان اصحابلي نسات داكشي..ولكن..صاحبي محمد قالي نانتيقش فالنساء!اقدر ايجي واحد نهار وتغذر بيا..من الاحسن..انا لي نخليها تعذب قبل ما تعذبني...
واخا كنت عيان ومقلق..
تفكرت المكالمة لي تلقيت اليوم من عند الواليد..
ماعجباتنيش الطريقةباش دوا معايا .ياك ما يكون عرف شي حاجة..على الورث..
هادشي زاد شوشني!خصني نتاصل بالواليدة نعرف شنو واقع!!

إرسال تعليق

يتم التشغيل بواسطة Blogger.