البارت 30:
--
عييت من الشطيح..وانا نجلس جات حدايا كريمة..
-مالكي احبيبة شفتك مقلقة ياكما ماعجباتكش الحفلة؟
-لا بالعكس زوينة..وانا فوجت على راسي..
-اه صافي عرفت شنو لي مقلقك..راجلك ماكيعاملكش مزيان!
-وشكون قالها لك؟
-راه كولشي باين اصاحبتي..سوليني انا..شحال كافحت وصبرت وفاللخر..ماتفاهمناش!
-لا انا ماشي لهاذ الدرجة! سمعي انا بغيت نمشي غذا لواحد العرس فالبلاد...ولكن مابغاش اديني...
-اوا اصاحبتي..شوفي كيف ديري قنعيه..
-نحزرو زعما؟لاااا..هي لي متكونش ليه..
-لا انما لقاي شي طريقة كتفاهمو بها بجوجكم..يعني الى انتوما مختالفين تال هاذ الدرجة..ضروري غتكونو كتفاهمو على شي حاجة..واخا تكون غير صغيرة!
-صافي شكرا..انا غنمشي دبا نحاول
نقنعو!بالسلامة.راه مشا الحال.وشكرا على كولشي!
-----دخلت للدار..لقيت الضوء طافي..زعما يكون ناعس دبا..هذي 12 ديال الليل..حيدت صباطي وانا نمشي طليت فالبيت..بقيت كندور كنفكر فشي طريقة تخليه يديني معاه للبلاد!
شنو الحاجة لي مشتركة بيناتنا؟شنو الحاجة لي تخليه يوافق يديني بزز منو؟
صافي لقيتها!!
دخلت للبيت..وانا نجلس فوق الناموسية..
شنو ندير نفيقو!والى تعصب عليا..
بقيت مترددة..
-خليل..خليل..
ماجاوبنيش..وانا نحركو وكانعيط بسميتو!
غير حركتو وهو ينقز وشعل الضوء..
-اش كاين..ياك لاباس؟واقعة شي حاجة؟
ماجاوبتوش حيث عرفت راسي قفرتها..مفيقاه من النعاس..باش نقنعو يديني للبلاد...افف..
-دوي ياكما واقعة شي حاجة للواليدة؟
-لا لا ماكاين والو..غير بغيت نهضر معاك..شي حاجة ضرورية!
-خليها حتال غذا..طيرتي ليا نعاسي..
-هانتا غير سمعني..دبا داك النهار ملي كنا عند اختك زينب.بقينا كنهضرو على البلاد وعلى العرس ديالنا..وبانت ليا زينب..متحمسة تحضرشي عرس فالبلاد مرة اخرى..وقلت علاش لا.. ماديرش ليها مفاجئة و تدينا للعرس ديال زيدان..
قلت داكشي لي عندي بالزربة..وهو يبدا يشوف فيا..زعما مامتيقش كلامي...رجع نعس..وانا نوض..عرفت راسي مادرت فيها والو..
شوية كنسمعو كيقول:
-واخا..وجدي راسك.غنديك انت وزينب..
حسيت بالفرحة..وانا نخرج من البيت..افف واخيرا..غنشوف ماما..توحشتها بزاااف!
ماقدرتش ننعس من الفرحة..ولكن ملي كنفكر شنو غيوقع ملي نلحقو على زينب باش نديوها للبلاد..وماتبغيش تمشي..كنتشوش..
ولكن هادشي مامنعنيش نتفاءلو..فالصباح فقنا بكري..وجدت حوايجي..ومشينا عند زينب..
-سلام خويا..دخل..مرحبا بك..
-كيدايرة ازينب..كيدايرة الواليدة لاباس؟
-الحمد لله..مرت خويا..لاباس عليك..
-لاباس.
-انير كاين فالدار؟
-لا مشا لايت بها..قاليك كاين شي عرس فالبلاد غيطلع ليه..
-اوا وجدي راسك..غتمشي معانا..
-كيفاش انا؟لا ماقلتهاش لانير!
-صافي بلا ماتفششي عليا..وجدي حوايجك..وانير خليه على حسابي..
-ولكن والواليدة..
-غير سيري ابنتي..انا غنبقى فالدار..فوجو على ريوسكم..
بقيت كنشوف فزينب..ياربي تقبل..
-واخا انا غنمشي نوجد حوايجي..
نقزت والضحكة فوجهي..وانا نقوليها:-نعاونك اختي زينب!
-لا بلاش غنجمعهم انا..
تسنينا زينب حتى وجدات راسها..ومشينا جيهة الطوموبيل..يالله كنت باغا نحل الباب وهي تجي زينب.
-حبيبة خليني نركب حدا خويا..توحشتو!
خليل حس بيا تقرست من داك الموقف..
شدينا الطريق..اوا و لالاهم زينب..عادما كتزيد تفقصني..كتعاود لخليل فين مشاو هي و أنير..وشنو شراو بجوج..وحتى هو بان ليا فرحان ليها..
وانا كيف الامانة..جالسة فداك الكرسي..وكنشوف وكنسمع وماكنهضرش...السيد ماقدر حتى ايدير معايا الصواب ولو مرة اخرجني ندور..
كيديني غير من سبيطار لسبيطار ...
-تانيلا..امدرا ولفتي؟
-اه ضروري نولف..
-خويا عافاك وقف شوية..خد. ليا شي حاجة ناكلها..مافطرتش مزيان..
-واخا هي اللولة..
وقت الطموبيل وخرج..
-احبيبة مالك ماجيتي مع خويا ولبارح...على الاقل تفوجي شوية..دانا انا و جويرية لواحد الريسطو ياسلام!خسارة ماجيتيش معاه..
ماجاوبتهاش..غير دخل السيد جايب معاه سندويش لزينب وليا حتى انا..مدو ليا وانا نجاوبو..
-مابغيتوش..شكرا..
-غير خليه..دبا يجيك الجوع
-لا غير عطيه لاختك!
--------
ماعرفت مال تانيلا مبدلة..فالصباح كانت فرحانة حيث غادية للبلاد.ولكن دغيا تقلبات..
وصلنا للدوار بعد 3ساعات ديال الطريق..ماعرفتش لاش حسيت ان هاد البلاصة صبحات بحال داري..حسيت بالراحة وانا كنشوف الدراري الصغار..كيدورو علينا..
مشينا عند عائلة تانيلا..رحبو بينا بزاف..تلقاو لينا بالتمر والحليب..
--------
احلى شعور هو ترجت لبلادك..بعد مدة اناحسيتها طويلة..غير وصلنا الدوار..مابقيتش تسوقت لزينب..ولا لكلامها..ملي لقيت راسي فالبيئة ديالي..خديت طاقة جديدة!
فاش وقفنا حدا الدار وكنشوف ماما قدام عيني...عنقتها بالجهد..حسيت براسي قداش توحشتها..وقداش توحشت دارنا وعائلتي..ماشعرتش بدموعي حتى سالو..ومانا كتقولي ماخصكش تبكي بالعكس لازم تفرحي..
ماما بقات كتزغرت..ودخلنا للدار سلمت على بابا..وعمي وعمتي وتتريت..
وجلسنا مجمعين..
عيطات ليا ماما للبيت..
-اشكيد ستامانو ايلي(اجي لحدايا ابنتي)
-ياغيي امارك نم ايمي (توحشتك اماما)
-حتى نكي..ولكن ماكم ياغن تضعافت(حتى انا..ولكن مالك ضعافيتي)
-والو غير ارميارح(والو غير ماولفتش)

إرسال تعليق

يتم التشغيل بواسطة Blogger.