البارت 27:

----فاش كنا فالطاكسي.تاصل خليل..مالقاناش فالدار وهي تقوليه حماتي بلي حنا عند زينب..باش ايجي يلحق علينا..
اوا دخلنا عند زينب..دارها كتحمق..واخا غير شقة بحال ديالي..ولكن مفرشة مزيان...ونقية..بقيت ساهية..كنقارنها بداري فالوقت لي خاصني نديها فداري..شديت الفراش!
اوا نضت صليت الظهر..وبقينا كالسين كنهضرو..ملي جا خليل..
انا غير ساكتة..وكنشوف الانسجام لي كاين بيناتهم..
خصوصا بين خليل واختو...عاد تاكدت بلي هما توام ديال بصاح..كيديرو نفس الحركات..وحتى التشابه لي بيناتهم واضح..فالشكل و في الافكار والتصرفات..
تفكرت خويا لي ماعشت معاه بزاف..خرج خدم فالبقالة وهو باقي صغير..دبا ملي تزوج..دا مراتو..وقليل فاش كيزورنا..
-الواليدة انا غنرجع للدار نرتاح شوية..يالله..
جاوبات زينب:-لا مي اتبقى معايا اليوم..سير انت حتى لغذا..
-اوا دي معاك تانيلا حتى هي ترتاح..
شاف فيا خليل باش نوض..وانا نوض سلمت على حماتي وزينب..وخرجنا من العمارة..
-راه بلاصيت الطوموبيل..بعيد شوية..تقدري تمشاي؟
-اه متشي مشكل..
بقينا غاديين..نقطعو الشارع..ملي وقف علينا واحد الراجل..وسلم على خليل..
-سلام خويا ممكن نسولك!
-اه مرحبا..
-انا شفت هاد البنت وعجباتني.ملي دخلات مع مها..بلا شك انت غتكون خوها..تسنيتك حتى خرجتي..وقلت نجي نهضر معاك الى ماعندك مشكل..
ناري اش كيقول هذا..تصدمت وبداو كيتبدلو فيا الالوان..شفت فخليل..بان ليا ماعجبوش الحال ولكن كاعما تعصب..بالعكس ابتاسم ليه..وجاوبو:
-هاذي لي كتسولني عليها راها المدام ديالي..
-اا اه سمح ليا...على هادشي ماقصدتش الله يخليكم لبعضياتكم..
غير مشا السيد وهو يدور عندي خليل..شاف فحوايجي..بحالا كيقلب على شي سبب يخاصم عليا..
-بقاي هنا..انا غنجيب الطوموبيل..
عصبني بهاد.التصرفات ديالوو..وماجاوبتوش..بقيت كندور وجهي..كنشوف فالناس غاديين جايين..حتى سمعت الكلاكصون ديال الطموبيل..وانا نمشي بان ليا بغا يحل الباب ديال القدام..وانا نمشي طلعت لور وجلست..
حسيت براسي حمضتو فهاد.اللقطة ولكن مزيانة فيه اتعلم احتارمني شوية!
حتى هو ماكانش ساهل..غير وصلنا للحي ديالنا..وهو يهبط دغيا وخلاني..بقيت كنطلع الدروج بشوية عليا..يالله وصلت الطابق الثاني..وهي تبان ليا المرا الشارفة كتسقي شي غرس حدا الباب..غير شافتني ابتاسمات ليا وحتى اتا مشيت وسلمت عليها..
-كيدايرة الالة لاباس؟
-الحمد لله ابنتي.وانت لاباس؟ عويناتك رجع ليهم اللون شوية..
-اه وليت الحمد لله بخير..واخت مزال كنعيا دغيا..
-هانتي ابنتي..العشية دوزي عندي..نصاوب ليك الماء ديال الرقية..ونعطيه ليك..وان شاء الله غيجيب الشفاء اقرب وقت..
بست ليها راسها:-ربي يخليك..انا غنمشي دبا خليت لك الراحة..
------هاد المرا دغيا دخلات ليا لقلبي..بقيت كنتسنى العشية بفارغ الصبر..ملي نعس خليل..لبست جلابتي وانا نهبط لعندها..دقيت عليها ودخلت..
لقيتها موجدة القهوة والبيسكوي..
-لقيتيني كنتسنى فيك..
-دارك زوينة بزاف..فشكل..انا عمري ماشفت شي دار بحال هادي.
-بصاح..كولشي كيقولها ليا..انا كنحب الازهار بزاف..والحمام لي شفتي فالسطاح حتى هو ديللي..هادشي باش كنتلف الوقت ديالي..وكنسى اني وحيدة..ولكن معايا الله سبحانه وتعالى..
-فكرتيني فالبلاد..الدنيا كولها خضراء..
-مزال ماوريتك والو..اجي تشوفي..
خرجنا للبالكون..كان كلو عامر بالورد...مختالف..وريحتهم زوينة..بقيت كنشوف..واحد الزهرة بيضاء..
-هاديك.زهرة الياسمين!
-اه زوينة بزاف...باينة راك كتعتاني بيها بزاف..
-اي وردة خاصها العناية ديال العبد من بعد العناية ديال الله عز وجل..باش ما تفقدش اللون ديالها..وحتى انت باينة فوجهك الصافي..انك.ماشي ديال هاد البيئة..ولكن راك محتاجة للعناية باش تفتحي كثر..وترجع ليك روحك..
-كلامك زوين وكيريح القلب اخالتي..
-انت اول وحدة غنرتاح ليك فهاد المدينة..وداكشي علبش مابغيتكش ضيعي..يالله ندخلو..نعطيك الماء لي قلت ليك عليه..
-واخا الله يجازيك بالخير..
عطاتني واحد البيدو كبير ديال الماء..
-هانتي ابنتي..انا قريت عليه سورة البقرة وايات الاستشفاء..هادشي تقدري ديره انت لراسك..الى كنتي ماتايقاش بيا..مهم غسلي بيه.او شربي منو..وحصني راسك بالادعية و اي حاجة خبيثة غتمشي باذن الله..وبعدي على خطوات الشيطان..الله يشافيك ابنتي..
-ربي يخليك..امين الله يجازيك بالخير..العصر كيأذن..نخليك دبا نمشي نصلي..
-اللع يتقبل..انا غنتسناك.تزوريني ان شاء الله..
-ضروري نجي..لازم تعاودي ليا قصتك ♡

إرسال تعليق

يتم التشغيل بواسطة Blogger.