البارت 26:

--------
صباح جديد..حليت عيني..وانا كنحاول نفيق ونوض من الفراش..
ملي حسيت بشي حاجة تضربات ليا فضهري..والوجع كيتزاد!بحال اول مرة كيجيني..بقيت كنترعد..حركت ايدي وانا ندفع خليل..غير حل عينيه وشافني..قالي...
-تانيلا..رعفتي!؟
حطيت ايدي تحت نيفي وانا نلقى الدم..عرفت راسي غادي نسخف..
لي عقلت عليه..هو خالتي..كتعيط ليا وكتخوي عليا الماء..وصوت الالات في السبيطار..
--------
-ناري اولدي..مال البنت..ماعجباتنيش حالتها...ياكما درتي ليها شي حاجة؟
-دبا يخرج الطبيب ونعرفو! انا من نهار تزوجت وانا فالمشاكل...وكلت الله على لي كان سباب..
-خليل الله يرضي عليك...ياكما ضربتيها...
-اش كتقولي امي...
-راه فراسي كولشي..
بانت ليا اختي زينب جات كتجري ومعاها أنير..
جراتني اختي بعيد عليهم.
-مالها عاوتاني؟شفتي طيحتي راسك فالمشاكل..
-اووف راسي غيتفرقع..هاهو الطبيب جاي..
-دكتور..مالها شنو عندها؟
-صراحة ماعرفتش بالضبط...في لحظة..شي حاجة ضربات ليها العمود الفقري...وحتى جهازها الهضمي متضرر بزاف..خصها تبقى في العناية شي أيام..
-دكتور.ياكما داكشي غيأثر عليها؟
-لا ماتخافش ماغيوقع ليها والوو.انما لازمها ترتاح..غترجع لحالتها الطبيعية..
-شكرا دكتور..
قرب مني أنير وحط ايديه على كتفي..
-ماغيوقع ليها والو باذن الله..بلاش ماتاصلو بواليديها..غيتشوشو على والو..
-واخا لي بان ليك...
--------
سلسلة من المشاكل..اقتاحمات حياتي الجميلة..ملي خرجت من السبيطار هاد المرة..وليت محبطة ومكتئبة..مابقيت باغا نهضر مع حتى واحد..كولشي ظلام في عيني...
مرض!انتكاسة!ألم..
شنو مزال باقي ماعطيتيهش ليا الدنيا؟
ملي وصلت لداري وقلبي زاد تزير عليا ماحملتش ندخل ليها..وكتوصلني منها ريحة كريهة!فبيتي حسيت بروحي غتخرج..وعقلي مابقاش خدام...
خليتهم حتى تشغلو وانا نوض..طلعت للسطاح ديال العمارة..وجلست فيه..عاد رجعات ليا الروح..
-بنتي..راه كاين البرد!
درت نشوف جيهة الصوت..لقيت واحد المرا كبيرة فالعمر..كتوكل شي حمامات.!
-باينة فيك مهمومة..وهازة فقلبك...شوفي ابنتي حتى حاجة ماتستاهل.
-حتى حاجة ماتستاهل..حتى انا مانستاهلش هادشي لي واقع ليا..
قربات مني وجلسات حدايا...
-شوفي فيا ابنتي!بنت صغيرة بحالك..هازة هادشي كولو!شكون وكلك ابنتي هاد العجب!
شفت فيها باستغراب
-راك واخدة دقة صحيحة..اعوذ بالله من الشيطان الرجيم..شنو بغاو منك..وانت فهاد العمر..رقي راسك ابنتي..الله يشافيك..
ماقدرتش نهضر او نجاوبها...هبطت لداري لقيت حماتي يالله بغات تخرج تقلب عليا..غير شافتني وهي دخلني للبيت دغيا..
-ماتبقايش تخرجي فهاد البرد ابنتي!
شفت فيها وانا نتفكر الكلام لي قالت ليا ديك المرا..
حطيت راسي علني نلقى شوية ديال الراحة فالنعاس..ولكن مالقيت غير الكوابيس و الخوف ..
فقت بالليل ..
شعلت الضوء..وانا كندور عييني فالبيت..بان ليا خليل ناعس حطيت راسي على يديه ربما نحس شوية بالامان ونقدر ننعس بسلام..سمعت الاذان ديال الفجر..
وانا نوض...توضيت..وفرشت السجادة..
وانا نتفكر بلي عمرني ماغنلقى الراحة ليكنقلب عليها فمكان اخر (شفت فخليل) من غير بين ايدين الله عز وجل..
بقيت كنصلي..وكنتضرع لله سبحانه وتعالى يسامحني..
فالاول ماقدرتش نركز فالصلاة..الشيطان كيمنعني...كنحس بالعياء..والارهاق..ولكن بقيت كنضغط على نفسي.. وانا كنقرا ايات من كتاب الله...
غير كنسجد كيطيحو دموعي بحال الشلال..داك الهم..والحزن والاكتئاب لي مخزون فقلبي..بدا كيتلاشى!
بقيت كندعي الله يتقبل مني..ويغفر ليا هجراني..
وانا كيفاش كنت غنعرف طعم الراحة والامان..وانا ملي تزوجت ما صليتش...ماحصنتش نفسي يوم عرسي!ماطلبتش الله يكفي عني شر الخلق..
المرا كان عندها الصح!انا ماشي طبيعية..وواقعة ليا شي حاجة..
هادشي كلو من فعل البشر! الله ياخذ الحق فلي كان سباب!
بديت كنرتاح نسبيا ملي بدات الشمس كتشرق..حسيت بروحي انتعشات..رجعت لبلاصتي..وغمضت عيني..
وانا نعس وهاد المرة بدون كوابيس!!
حليت عيني فالصباح..مع العشرة..
خليل غيكون مشا لخدمتو..نضت بشوية عليا دخلت للحمام..دوشت..ولبست بيجامتي..وانا نخرج نوجد الفطور..
لقيت حماتي كتفطر بوحدها..
-صباح الخير ابنتي..اجي فطري معايا..باينة غتكوني ارتاحيتي مزيان!
-اه اخالتي اليوم الحمد لله ارتاحيت..
جلسنا كنفطرو..
-يالله الى فطرتي لبسي جلابتك..نخرجو انا وياك..الجو زوين اليوم..
-واخا هي اللولة..
----اوا خرجنا فرحت بزاف ملي مابقيتش فالدار مشينا لمرجان..تقدينا مزيان..حماتي ماخلات ما شرات ليا..بحالا اول مرة كتوجد لي دهازي..
ومشينا للسوق..خدات ليا جوج كساوي عصريين..وفولارات..
ملي وصلات وقت الغذاء..مشينا تغدينا فالمرسى..
ناري على جو ديال البحر..ريحني بزاف..ماكانتش الشمس بزاف بالعكس كان الجو معتدل..
هادي اول مرة نجي لهنا..قلتها لحماتي..وبدات كتبتاسم..
-اوا نقول لولدي خليل ابقى ديما يخرجك..
-فاش كنت كنجي لاكادير كنا كنزورو غير شي بلايص قلال..حيث بابا ماكيولفش..
-عندو الحق..اصلا الجو ديال البادية احسن بزاف..وكيوالمك انت..يالله بسم الله..كولي الحوت..
-عاد تفتحات ليا الشهية..بسم الله..
كلينا مزيان..وشدينا طاكسي نمشيو عند زينب.

إرسال تعليق

يتم التشغيل بواسطة Blogger.