البارت 25:
-حتى انا كنت كنحس بلي مريم..غير نية ولكن..في الاخير غدراتني..ودات الولد هانتا كتشوف حالتي..
-حالتك كتقطع القلب..غير صبر دبا يحن الله..
-اوا رد بالك لا دير معاها الولاد وتديهم ليك..وتبقى تحسر على كبدتك!
-ماتخافش اصاحبي..انا داير الحساب لكولشي خصني غير نقاد شي أمور..يالله نخليك دبا..نمشي نرتاح..
-واخا انا غنبقى هنا شوية..غذا ماخدامينش!
ملي كنت راجع للدار..دزت للمارشي خديت شي حاجة خاصة للدار..والخضرة والديسر..وخديت الشكلاط لي كيعجبني..
دخلت للدار غير حليت الباب..كنلقى الواليدة فالصالون..
-ولدي على سلامتك..لاباس.
-الله يسلمك الميمة.كيداير با لاباس..امتى جيتي!
-اختك زينب لي قالت ليا نجي نونسها شوية..اوا وتوحشتكم..بغيت نشوفكم..
-مرحبا بك.احسن حاجة درتيها..
اوا بقيت كنتحدث مع الواليدة..خبراتني بلي الواليد مابقاش مشارك مع بابات جويرية في المحل..باعوه وكل واحد خدا حقو..ودفع دوك الفلوس في واحد الارض يبنيها..
حسيت بالواليدة مقلقة من شي حاجة..خصوصا فاش كنا كنتعشاو بقاو هي و تانيلا كيشوفو فبعضياتهم..
تعشينا وهي تجبد الواليدة دوك الميكات لي تقديت..لقات الشكلاط لي جبت..وجلسنا كناكلوه..
---------
فالحقيقة هادي اول مرة كنحس براسي مزوجة...وجدت العشاء لحماتي و خليل...
حسيت بالدفء الاسري واخا ماشي كيف دارنا..ولكن حسن من اني نبقى فالبيت كناكل بوحدي..
عطاتني حماتي قطعة من الشكلاط غير وصلتها لفمي..وهي تقلب كرشي..مشيت كنجري وبديت كنرد...ندمت كاع علاش كليتها..
-بنتي ياك لاباس علاش كتردي!انت مريضة؟
-لا اخالتي شوية..
-ياكما تكوني حاملة!!!!بلاشك..هذا هو السبب.
هاد الكلمة لي قالت..بقات كضرب ليا قراسي بالجهد..للحظة خفت ليكون كلامها صحيح...ملي تذكرت أنني ولله الحمد ماشي حاملة!!.
خليل وخلات ليه الشكلاطة..خنزر فينا وهو يمشي للبيت..
-ولدي..مالك..دبا نديوها للطبيب نتاكدو!
-اش كتخربقي مي شمن حمل..الله يهديك..تصبحو على خير..
-ناري مال الراجل..سيري ابنتي شوفي مالو..غيكون تعصب من كلامي..انا مكنبغيش نتدخل ليه فحياتو..انا غنوض نصلي الشفع والوتر وننعس..
-تصبحي على خير.
دفعت الباب ديال بيت النعاس..
وانا نطل..بان ليا ناعس..حاولت ندير صداع باي حاجة..باش افهم راسو..انا مزال مقلقة منو..ومابغينش نشوفو فبيتي!
-بلا ماتبقاي مصدعاني..غذا غنرجع للبيت فين موالف.غير تمشي الواليدة..
جبد عليه الغطاء ونعس..
بقيت كنشوف حتى عييت وانا نجلس فطرف الناموسية..حسيت بكرشي كضرني..وانا نهز ماء الورد من المجر ودرتو لوجهي باش ماتشدنيش السخفة بحال ديما..
-شنو هاد الريحة!؟واش انت بعقلك!!
-ااا هذا غير ماء الورد..
-اكون الورد ولا حتى الزعتر..عندي حساسية منو...حيديه من البيت..
خرجت للطواليط حتى غسلت وجهي باش تمشي الريحة..ورجعت معصبة..حتى تاكدت بلي نعس..وانا نعس!!حسيت براسي تشمت فهاد الزواج..حسيت براسي عاودت نفس تجربة صاحبتي عائشة لي فشلات فالزواج!
تمنيت نرجع لدارنا..انا هنا حاسة براسي غريبة حتى واحد ماباغيني..وماعندي حتى دور..وهذا لي حدايا..كرهتو من نهار مد ايديه عليا..فالبلاد كان اصحابلي غير مغرور وغنهرس ليه غرورو ولكن صدق شخص اخر.ماكنعرفوش..وكون غير ماعرفتوش!!
بابا كون غير ماوافقتيش على هاد الزواج...أنير كون غير ما بغيتيش اخت هاد الانسان..ومادخلتونيش فهاد الدوامة!حياتي دبا..مرتبطة بحياة أنير..
[[[[ﻣﻦ ﺃﺷﺪ ﺃﻧﻮﺍﻉ ﺍﻟﻈﻠﻢ ﺍﻻﺟﺘﻤﺎﻋﻰ ﻫﻮ ﺑﺤﺚ ﺍﻻﻫﻞ
ﻋﻦ ﺯﻭﺟﺔ ﺻﺎﻟﺤﺔ ﻻﺑﻨﻬﻢ ﺍلسيىء]]]]
غمضت عيني..ربما الى تفاءلت غذا اكون حسن من اليوم..
-------ريحة الورد ما بغاتش تمشي..خلاتني هادي اليوم بلا نعاس...
أنا بديت كنتيق !أن النساء ناقصات عقل..!
بقيت مغمض عيني وكنتصنت لقلبي!تفكرت كلام صاحبي محمد!
تفكرت حالتو كيفاش كان..نهار عرف أن مرتو كتعرف شخص اخر..تصدم!انهار!تعصب!
بزز باش قدرنا انا و زيدان نرجعو ليه عقلو...
ماعرفتش شنو كيخلي الانسان اخون...
ماعمرني آمنت ب شي علاقة من غير علاقتي بواليديا وعلاقتي الاخوية باختي زينب..
هادشي لي خلاني نكون مناعة عاطفية!
طبعي صعيب وكنتسرع وهادشي حيث مزال ما لقيت لي يفهمني!

إرسال تعليق

يتم التشغيل بواسطة Blogger.