البارت 21:

----
نرحل؟ولكن خليل ماعلمني بحتى حاجة؟
شافت فيا جويرية:
-لعجب!راجلك ومايعلمكش!
-صافي ماشي مشكل..انا غنصوني عليه..نسولو!
نقزات زينب:
-كيفاش تصوني عليه!راه خدام زعما ماغيجي حتال الستة..حنا غنديو دبا حوايجك..والباقي راه غيصيفط خويا لي يديه!
-اه واخا..
جمعنا حوايجي...وجمعات زينب وصاحبتها حوايج خليل..ومشينا فطاكسي..
كان اصحابلي غنجيو لشي بلاصة حسن من هاد الشقة! ولكن حنا بدلنا غير الحي..وخليل اختار لينا نسكنو في شقة اخرى!
حلات زينب الباب..
-تانيلا دخلي؟ اكيد عجباتك الدار؟ انا لي اختاريتها بنفسي! حيث حتى انا وانير ساكنين قراب من هنا!
-كيفاش واش ماسكنتوش فايت بها؟
-هههه لا احبببة..اما كاعما ولفت تما..وجينا كرينا هنا..اوا مالكي حشمانة..دبا نحولو الفراش ودغيا غتولفي!
-اه ان شاء الله..
-يالله حنا غنمشيو دبا..ماتنسايش راه دبا غيجي الراجل لي غيجيب الفراش..
-واخا بسلامة!!
بقيت كندور فالدار..فيها 3ديال البيوت..وكوزينة..وحمام ودوش! واخا كلها شراجم..حاسة براسي مخنوقة! هادي هي المدينة..تقول مافيهاش النفس!كل نهار كتزيد تخنقك بايديها!كتضغط عليك..وانت كتحاول تولف الحياة فيها!
حليت واحد الشرجم..وانا نلقا واحد طريف ديال الجردة التحت..كيلعبو فيها دراري صغار!!
سهيت فهاد المنظر! تفكرت دراري الصغار فاش كيلعبو حدا دارنا..كنت كنبقا نقابلهم ولا مرة مرة كنخرج نلعب معاهم..حتى كتجي مي دخلني للدار!
تفكرت اول مرة نلعب الكرة في صغري..حطوني نحرس ليهم المرمى! وفاش بغا انير اماركي هدف..حبست الكرة بواحد اليد..وهي تفدع ليا.. شحال وهو كيحزرني مانقولش ليهم بلي هو السبب!!
سمعت الدقان فالباب..
-شكون ؟
-سي خليل! راني جبت الفراش!
-راجلي ماكاينش اسيدي!
-واخا الالة حلي لينا ندخلو الفراش!
((تفكرت ماما ملي كتقول ليا..عمر المرا الحرة ماكدخل راجل غريب الى ماكانش راجلها ))
-سمحليا اسيدي مانقدرش نحل الباب حتى يجي راجلي!!
-ولكن الالة حنا عندنا مايدار..ماغنبقاوش نتسناو هنا!ها الفراش حدا الباب..ضبري لراسك!!
-واخا اسيدي غير حطوه وسيرو!
-والخلاص؟
تلفت ماعرفت ماندير...انا ماهازة معايا والو!!
-شوف اسيدي..انا ماخلا ليا راجلي والو!..بقاو تسناو دبا يجي ويخلصكم!
-الله يعطيني الصبر!!الالة غير دخلي للفراش!

خليتهم وانا نمشي كنطل من الشرجم..فين تعطل خليل!؟ فاتت الستة وهو كاعما رجع؟
بديت كنسمع الصوت ديال الرجال فالدار..سديت عليا البيت حتى خرجو!عرفتو ماغيكون غير خليل لي دخلهم احطو الفراش..
-تانيلا!! فيييينك؟

إرسال تعليق

يتم التشغيل بواسطة Blogger.