البارت 17:

-----العرس قرب اسالي..والناس بداو كيمشيو..
حنا العائلة دخلنا للبيت وبقينا كنتصورو بيناتنا..
ملي سالينا جا الوقت باش نودع عائلتي...تفارقنا غير بالدموع..وحتى زينب بكات بزاف....ملي بغيت نمشي عطاتني الواليدة تلفون قالت ليا بلي سارة صفطاتو ليا..
-----صافي خرجنا من الدوار انير وزينب سبقونا فطموبيلة كراها انير..
و حنا ركبنا مع واليديه فالطموبيل..والعائلة ديالو تابعينا..
الطريق كلها ماهضرتش كنشوف فالنافذة و حاسة بالدوخة والسخفة.
]] ﻧَﺂﻓِﺬَﻩ ﻣَﻬﺠّﻮﺭَﻩ وطفلة أهلكها الحنين... ]]

..خليل كان كيهضر هو و باه على العرس..قاليك ماكانش باغي كاع الا حفلة صغيرة..
وصلنا اكادير مع 2ديال الليل...
طلعنا للعمارة...وحتى واليدين خليل جاو معانا..غير دخلنا وهي تقلب كرشي..جراتني حماتي دغيا للطواليط...
-ياك لاباس اشنو كليتي؟
-والو غير تعشيت.
-غتكوني غيرماموالفاش السفر..يالله نديك لبيتك..

دخلاتني حماتي لواحد البيت..عاوناتني حتى حيدت عليا دوك الحوايج لي كنت متقلة بيهم..حطات ايديها فوق جبهتي وهي تخلع..
-حرارتك طالعة بزاف!واش متاكدة بلي ماكليتي والو؟
-ماعرفت..
شافت فيا وا الشوفة ديال الشك..
-ياكما كتمرضي بحال هكا ديما؟
-لا اخالتي..هادي اول مرة..كرشي كتقطع بالوجع!
خرجات من البيت..وانا مابغاش ايجيني النعاس!.
------------
-الواليدة مالها؟علاش كانت كترد؟
نقز الواليد وبقا كيغوث..
-اوا ياك قلت ليكم هاد الزواج ماعاجبنيش..وهانتوما صفطو ليكم بنت مريضة!
-الله يهديك الحاج.. خليونا نشوفو مالها هو الاول..وديك الساعة الى كانت مريضة بصاح....
قاطعها الواليد: -نصيفطوها لدار باها هذا هو الحل لي بان ليا...
-الله يخليكم..سكتو شوية راه البنت غتكون كتسمع!غذا فالصباح نفكو هاد الحريرة!
-اوا تسمع...عمرني ماشفت شي عروسة مريضة نهار عرسها..الحاجة..يالله نمشيو نرتاحو.خليه ادبر لراسو..
-واخا.ميكون غير خاطرك الحاج!

إرسال تعليق

يتم التشغيل بواسطة Blogger.