البارت 16:

كيف ديما التقاليد الامازيغية..كيخص العريس اطلع للسطاح قبل مادخل العروسة ديالو.وابقى يلوح عليهم اللوز والزبيب..
انا كنت فالبيت كيوجدو فيا باش نخرج..باللبسة الامازيغية بالقفطان ديالها والقطيب..حيث بالبادية العروسة كتلبس غير لبسة واحدة..هي باش كتمشي لدار راجلها..
الواليدة عطاتني كاع النقرة لي عندها بحكم انني البنت الوحيدة لي عندها يعني غندي كولشي...لي كانت خازناه..
حطو ليا فوق راسي (اسرسل)ديال النقرة..و علقو ليا (لوبانة)حول العنق ديالي..وحطو ليا فايدي تنبايلت(النبالة) كولها ديال النقرة..
حسيت براسي ثقيلة فهادشي لي علقو ليا..
وغطاوني بزيف.
بقات معايا الواليدة شوية..حسيت بها بغات تبكي من دبا..وبقات كتنصح.فيا..
شوية دخل بابا وحط ليا العقد ووقعت عليه..
-افلام ارضو ربي ايلي(الله يرضي عليك ابنتي)
.......
شوية وهما يدخلو العروس زينب مع شي بنات جاو معاها..عجبني بزاف اللباس ديالها الصحراوي.كانت لابسة ملحفة وظافرة شعرها بطريقة زوينة وايديها عامرين بالحناء..وحاطة بزاف ديال المجوهرات ولمشاع فوق راسها...سلمت عليها..وبقينا كنتسناو امتى نخرجو..
وكنسمعو العيالات كيزغرتو....وكيفنيو مرة بالامازيغية و مرة كيغنيو العيالات لي جاو مع زينب..بالحسانية..
------جا الوقت باش نخرجو عند الناس..دخلات الواليدة وشي عيالات..ماعرفتهمش..وغطاولي وجهي..وحتى زينب نفس الشيء.حيث العروس ماخاص حتى واحد من غير محارمها اشوف زينتها...وخرجونا فين غنجلسو..باش حتى حنا نحضرو لاحواش..
جلسنا فواحد القنت وجاو صحاباتي والبنات لي متالقات بقفاطنهم تجمعو عليا..بقينا كنهضرو شوية....كيبان لي خليل لابس دراعية صحراوية..وانير لابس جلابة بيضاء..
بقيت كنضحك من هاد الاختلاف لي بيناتنا..وكيفاش هاد الزواج كمل..
-----ملي سالا احواش..بدات الرقصة الصحراوية..ديال واحد الفرقة جابوها من العيون..
على انغامها الهادئة..بانو ليا الناس ناشطين..واخا شي وحدين مافهموش لغتهم..ولكن كيبان كولشي غادي مزيان..
قربات منا واحد المرا..
-يالله باش تعشاو..
نوضونا انا وزينب..رجعنا للبيت...
لقيناهم حاطين لينا الطباسل ديال اللحم والديسير..
كنا فالبيت غير انا وزينب والواليدة وواحد البنت جات مت زينب..واقيلا صاحبتها..
شوية دخلات علينا واحد المراة..سلمات عليا..
-تبارك الله غزالة..
-ربي يخليك..
ومشات عند زينب وعنقاتها..قالتلي الواليدة بلي هادي حماتي..
بديت كناكل..وزينب وصاحبتها كانو كيهضرو وكيضحكو..
فاش كلينا..مابقيناش خرجنا من البيت..حيث بداو العيالات كيدخلو وكيباركو لينا..بدا كيجيني العياء والمعدة ديالي كضرني..ماكانش عليا نثقل فالماكلة..خصوصا فنهار عرسي..جاني النعاس...بقيت غير كنتفوه..قربات مني عائشة صاحبتي..
-جاك النعاس من دبا ماتنسايش بلي تابعاك الطريق!
-والله الى عييت ماعرفت مالي حاسة براسي ثقيلة..
-غير صبري راه مابقا والو..

إرسال تعليق

يتم التشغيل بواسطة Blogger.