البارت 14:

---------
يالله وصل ولد عمي انير...كنا كنتعشاو ملي دق علينا..غير دخل وانا نوض نحط ليه الطبسيل ديالو..بان ليا جايب معاه اخبار زوينة...الفرحة باينة على وجهو..
قالينا بلي الى وجدنا بكري غادي يمشيو اخطبو البنت..
السيمانة كلها ومرت عمي وماما كيوجدو شنو غيديو فالخطبة..وجدو كولشي الا الخاتم حيث انير قرر اشريه على ذوق زينب ملي يوصلو العيون..
اليوم غادي يشدو الطريق مع الصباح سمعنا الدقان فالدار..غير حليت هي دخل جدة ماخلاتنيش نسلم عليها..مشات للبيت فين جالسين وهي تقوليهم بلي حتى هي غتمشي للخطبة..
جاب انير الطموبيل..كولشي مشا من غيري انا..كان خاص شي وحدة فينا تبقى تقابل البقرة..جمعت الدار وانا ناخد الدفتر فاش كنكتب..وطلعت للسطاح وبديت كنخربق فيه..
--------------
-الواليدة امدرا وجدتو كولشي؟
-صافي كولشي واجد..سير شوف باك شنو كيدور فراسو!
مشيت عند الواليد سلمت عليه..وبدا عليا بالاسطوانة ديال ديما..كان اصحابلي ماغيجبدش معايا هاد الموضوع..وخصوصا فهاد الوقت..جاب الله جات اختي زينب قالت ليا بلي عائلة انير قريب يوصل وبلي خاصني نخرج معاها باش اتلاقاو اشريو الخاتم دغيا باش تجي للدار وتوجد راسها.
-جيتي فالوقت المناسب..
-شنو كان كيقوليك با؟
-راك عارفة نفس الموضوع ديال جويرية..
مزال ماكملت هضرتي وانا نلقا جويرية واقفة حدا الباب..زينب غير شافتها وهي تفرح..وبدات كتعرض عليها تمشي معانا..
-ولكن ا زينب راك غتلاقاي مع خطيبك تشريو الخاتم..
-صافي اخويا راه غير بغيتها تعاوني..راك عارف مانقدرش نتلاقاه بوحدي..
-واخا لي بغيتي..
ركبنا فطموبيلتي...ومشينا للسوق عند شي ذهيبي كيعرفو الواليد..بقينا كنتسناو شي ربع ساعة حتى جا انير..بقاو كيجربو الخواتم حتى قنطت..دازت نصف ساعة عاد لقات الخاتم لي عجبها..
بدا الظلام كيطيح..ملي دخلنا للدار ومشيت جلست مع الضياف..زينب وصاحبتها مشاو اوجدو راسهم..
غير تعشينا وحنا نتجمعو باش البسو الخواتم..
كولشي فرحان من غير جدة انير لي باينة فيها ماحملاتنيش..كنطلب ربي غير مايهضروش على موضوع زواجي ببنتهم..حيث لحد الان مزال ماقلت والو لعائلتي..وماشي هذا الوقت باش اعرفو من شي حد غريب..
ملي سالينا..مابغاوش اجلسو كل واحد عندو اشغالو..واخا عيات الواليدة معاهم باش اباتو ولكن ماقبلوش.
----------
ملي دخلو مالين الدار من السفر..وجدة كتنكر ماعرفت شنو لي ماعجبهاش!
طلبت من الواليدة ديك العشية نخرج عند البنات ولكن ماخلاتنيش قالت بلي انا دبا خصني نقص من الدخول والخروج!
وانا كيف العادة مادرت حتى ردة فعل..
خصوصا ملي قالت ليا بلي انير جاب ليا معاه شي حاجة من اكادير..تسنيتو حتى فاق من النعاس وانا نمشي سولتو على خطيبتو وكيف دازت الخطبة..وشفت التصاور لي دارو..عطاتني بزاف وباينة فيها انسانة ضريفة..طلعات واحد الصورة فيها انير وخطيبتو و داك الغريب..خليل..
-تانيلا اويغامد يان الكادو؟(جبت ليك واحد الكادو)
-بصاح!
ناض انير جبد واحد المحفظة صغيرة فيها حاسوب صغير..
-بصاح وينو اياد(بصاح ديالي هذا)؟
-ييه..
-تنميرت باهرا(شكرا بزاف)
هزيتو ومشيت كنجري لبيتي فرحت بزاف..وانا نشعلو..
----------------
نرجعو للعيون...
-الواليدة بغيتك تعاونيني فواحد الموضوع!
-نعم اولدي ياكما كاين باس؟
-الواليدة راه زينب قالت ليا كولشي..مسالة ديال الورث وداكشي لي وقع مع بابات جويرية ماعجبنيش..
-انا اولدي ماكنتدخلش فخدمة باك..
-عارف انك ماكتقدري تقولي ليه والو..داكشي علاش باغي يدير ما بغا ويتحكم لي فحياتي..ولكن باش توصل بيه الدرجة يحرمني من الورث..
-شكون قاليك هاد الهضرة ؟
-الواليدة انا راه قررت نتزوج..صافي خلينا نتهناو من هاد الموضوع..ونمشي لخدمتي..
-راني كنعرفك مزيان علاش ناوي؟
-انا غنتزوج ببنت عم انير!راني هضرت مع بات البنت ووافقو!
-بهاد السرعة ..بلا ماتقولي والو ...
-حتى دبا مزال الحال..بغيتك تهضري مع الواليد...انت غيسمع منك!
-ان شاء الله..الله يصاوب..

إرسال تعليق

يتم التشغيل بواسطة Blogger.