كاد الأستاذ أن يكون حبيبا‬, قصة,
البارت 10:

-----كنت جالس فالسيارة ديالي كنمسحها من الغبرة..ملي جا عندي انير..
-اهلا صاحبي كيف بقات رجليك شوية؟
-الحمد لله..لاباس..غادي تبرى!
-غير سمح ليا اصاحبي بسبابي وقع ليك هادشي!
-لا ماتقولش هاد الهضرة..انا بغيت منك واحد الخدمة الى كان ممكن!ماتردهاش فوجهي..
-مرحبا..
-بغيت ناخد من عندك الحاسوب ديالك والموديم..
-اه بغيتيه دبا..انا نمشي نجيبو من الدار!
جبت الحاسوب ديالي..وعطيتو لانير..
-ماغاديش تشد لينا التغطية هنا..اجي معايا..

مشينا قوق الصخرة للكبيرة ولكن هاد المرة..حتى حد ماوقعات ليه شي حاجة..عطيت الحاسوب ديالي لانير..وشدات لينا الانترنت مزيان.بان ليا كيصاوب واحد المنتدى..باسم تانيلا!! تعجبت فالاول ولكن من بعد ما اهتميتش بالامر!فاش سالا..
-هذا منتدى صاوبتو على قبل بنت عمي..باش تبقا تحط فيه اي حاجة كتباتها!!
-اه فكرة مزيانة بزاف...هي كتكتب؟
-هي بدات شحال هادي وانا بغيت نعاونها..
فاش سالا عطاني الحاسوب..وانا نحل السكايب! لحسن الحظ لقيت اختي داخلة...اصرت باش تشوفني! وحتى انا شفت الواليدة ديالي وطمئنتهم عليا وخبرتهم بلي غندوز عندهم شي ايام...
اختي زينب توأم ديالي..هي عندها محل جاهز لبيع الملابس النسائية فعمرها 29سنة..انا وياها كنتفاهمو بزاف..ديما كنجي عندي لاكادير..تربينا وكبرنا بجوج عندنا افكار مشتركة..
-اختي ماكرهتش كون جيتي معايا هاد البلاصة زوينة بزاف!انا دبا فوق واحد الصخرة كبيرة!
-يالله غتقولها..حتى مشيتي..وا رد البال لراسك..عنداك راه الجبل صعيب..
-ماتخافيش ماجايش بوحدي!جاي معايا صاحبي أنير..
وانا ندور الحاسوب..
-هذا صاحبي أنير..وهاذي اختي زينب..
-متشرفين!
-خويا أنا ختصني ضروري ندوي معاك فواحد الموضوع مهم..
سمعها انير وهو ينوض من حدايا وبعد شوية..
-تقدري تهضري دبا!
-الموضوع متعلق بالواليد..راه وصلاتو لخبار بلي مابقيتيش مع جويرية..ماتصورش شحال مقلق منك..خصوصا ملي جا باها عندنا..
-راك عارفاني ماغنبدلش رأيي..انا درت لكم خاطركم حاولت نتعرف عليها كثر..ولكن ماكنحس جيهتها بحتى حاجة..هي صديقة وصافي..
-أنا حيث عارفاك مزيان..خايفة لا دير شي حاجة تندم عليها..خويا....تيق بيا ماغتلقاش حسن منها..
-زينب!!
-انت راك غتخرج علينا بهاد التصرف..باها جا قالك هادشي لي درتي مامزيانش ومابقاش بغا يشارك معانا فالمحل لي فالمدينة..
-وشنو دخل الخدمة فهاد المسائل الشخصية.؟
-كولشي متداخل..حتى من الورث والخدمة والزواج..
-اشنو كتقصدي؟
-والو غير خليني ساكتة حسن..
-زينب ماتعصبينيش!!
-الواليد قاليك الى ماتزوجتيش لدبا غادي يحرمك من الورث..هو معصب بزاف..
-انت كتقولي هكا غير باش نرجع مع حيث جويرية صاحبتك!؟
-لا والله الى هادشي لي سمعتو كيقول!اوا قالك انت كبرتي ومابغيتيش تجمع راسك..وبلي فلوسك كتخصرهم غير فالدوران..خاف على ثروتو تمشي غير هكاك..
-لا هادشي لي بقا..
-خويا تقلقتي!مالها جويرية راني كنعرفها مزيان كتبغيك..علاش راسك قاسح..
-زينب..بالسلامة..
قطعت المكالمة وسديت الحاسوب ورجعنا للدار انير بقا كيسولني شنو واقع ليا ولكن ماجوبتوش..دخلت للدار عاودت لزيدان كولشي!!
بالليل مانعستش خصوصا ملي تاصلت بالواليدة وماجاوباتنيش!بقيت كنفكر الورث ديال الواليد مانقدرش نتحرم منو واخا يوقع لي يوقع هذاك حقي الشرعي!شنو زعما اقدر ايديرها؟انا والواليد ديالي مامفاهمينش بزاف..خصوصا ملي ماخدمتش معاه..كملت قرايتي ودرت داكشي لي بغيت..ماندمتش ملي هزيت حوايجي وخويت الدار..باش نكمل دراستي الجامعية..وهاني دبا أستاذ للتربية البدنية!
تلفت ..زيدان حس بيا مانعستش..وبقينا كنهضرو!
-خليل علاش لي ماتزوجش وتبين للواليد ديالك بلي انت انسان مسؤول ومابقيتيش طايش في نظرو؟
-زيدان راني هربت من الزواج من جويرية ماشي باش ترجعني ليها!
-اوا فكر فشي حل آخر..
-تلفت والله!أكيد شي حاجة واقعة..والواليد كيخطط لشي حاجة أنا متأكد!
-ماتشطنش راسك بهادشي..جاوني شي أفكار خايبة..
-لا براكة عليا من دوك الخطط ديالك!حيث انا الوحيد لي غنتضرر منهم..
-اوا تزوج وهنينا!
سكت شحال وانا كنفكر..:-غنتزوج..
ناض زيدان..:-هي نشوف لك مع اخت خطيبتي؟
-لا..خليني حتى نلقاها..وتقبل عليا!..
--------فالصباح فقت معطل..الليل متقدرتش ننعس!
تسنيت بزاف باش تلاقيت بأنير..ماقدرتش نهضر..حتى زيدان كان معايا..
-خويا أنير!
-اهلا..كنت كنقلب عليك..بغيت نهضر معاك فواحد الموضوع!
-حتى أنا بغيت ندوي معاك فشي حاجة!
-واخا زيدو نجلسو...

إرسال تعليق

يتم التشغيل بواسطة Blogger.